عبدالستار زيدان يكتب : اتكلم

كتب : عبدالستار زيدان

اتكلّم يا ابني .. وما تخافشي

عين الجبان ... ما تنامشي !

وإن نامت .. تصّحى مفزوعه

وراحة البال ... ما تطولشي !

وتعيش حياتها كده ... مخدّوعه

وعنيها تايهه ... ما تشوفشي

وان شافت .. ما تلقى إلا كابوس

وجوّ قلوبهم .. لسّه مضلّم !

اتكلّم

اتكلّم وليه ... تخنق شكوّتك !؟

وتحبس دمعك .. وتتوه ضحكتك !؟

اتنفّس .. اغضب .. واتضايق ..

مخالب الخوف .. جواك خنقتك !

البدله الحمره ... دايماً لابسّها

وبإشارة .. تتحدد ساعة حضرتك

وتموت يا حبيبي ... كدا فطيس

طول ما أنت دايماً ..... مسلّم !!

اتكلّم

اتكلّم ولاّ أنت عاجبك ... زُلك !

بلد بيتسرق .. دمك بيتحرق !!

ولسّه محتاج حدّ ... يدّلك !

وياخدك من إيدك ... ويقول لك

شباب شاخ ... انتظار وعودهم !

وتصدّق كلامهم .. مين قال لك ؟

تسّتنى عايش ... فى الأوهام !!

ولقوت ولادك ... تفضل تلملّم !!

اتكلّم

اتكلّم يمكن ... تلقى أحباب .

أصحاب يمكن ... نفس التراب

والصوت هايبقى .. اتنين نلاته

تعّلى . وتكّتر .. تشقّ الضباب !

وبداية القصة ... بالحق كلمه

فتّحت عنيهم ...ع السّراب

يا ناس احنا بنحلّم .... ولاّ

فاق الدروايش .. ونطق المعلّم !!

اتكلّم

اتكلّم ........ وما تورثّي خوفك !!

تاريخك ها يلعنك ... وينكر ظروفك

والكل عايز ... هنا يسمعك !!!

بكلمتك ... ها اتبني كل صفوفك

ما فيش حد .... ها يقدر يمنعك

دا كلمتك ...... هي بداية وقوفك

ما تقلقش من حد ... مره يسمعك

دا الكل زيّك ... ساكت بيتالّم

اتكلّم .... اتكلّم .... اتكلم

Tweet