ساعات "شكرًا" ما بتكفـّيش | قصيدة لـ أحمـد ماهـِر

ساعات "شكرًا" ما بتكفـّيش
لناس في القلب .. مابتمشيش
لناس حلوة ..
و ضحكتها ..
تلون دنيتي بمبي ..
لناس بلسم ..
بعيد لكن هنا جمبي ..
و مش ذنبي ..
اشيلهم جوة في عينيا ..
انا اصلي مانيش ..
بنافق دا و اثبّت دا ..
بقول اللي بفكر فيه ..
مجاملة مفيش ..
و لو مالقيتش فيه الصدق ..
بقول له: يا صاحبي ببساطة ..
ماتنفعنيش
و لو مالقيتش فيها الحب ..
بقول: آسف .. ماحبتكيش ..

ساعات برضه .. تلاقي مسوخ ..
و ناي مشروخ ..
مفيش احساس ..
شيطان خنّاس ..
تحاول مرة تحسن ليه ..
تمد ايديك تاخد يإيديه ..
و باقي القصة معروفة .. هنحكي فـ ايه ؟
ساعات "شكرًا" ما بتوفـّيش

و ياما ساعات .. قولة "آسف" ما بتأدّيش
لناس حبـّتنا بقلوبها ..
و شافوا فينا أحلامهم ..
و ماقدرناش نحقـّقهم ..
و انا الخسران ..
ماخسرونيش ..

و ناس كبّرنا أحجامهـُم ..
خدو من قلبنا و روحنا ..
و همّ صفار .. و قيمة مفيش ..

ساعات في كلام نقوله لناس ..
ما بيوصـّلش أحوالنا و لا إحساس ..
و حلـّها سهل .. مش كيميا ..
هيسمع نبضنا و يحسّ .. يبقى حبيب ..
و لو مافهمش قبل الكلمة .. يبقى غريب ..
نوفـّر جهد توصيلها لحاجة تسيب ..
حاجات حلوة في أيامنا ..
و أتمنى ..
يا أخ غريب ..
. ماتفهمنيش