مسرحية ظلموه

مسرحية ظلموه

بقلم : احمد همام بركات

كلنا بالتاكيد نعرف اغنية ظلموه للفنان عبد الحليم حافظ

الاغنية تدور حول قلب عبد الحليم الذى يخشى الوقوع فى الحب ... لكن فجاة يقابل احد الرموش ويقع فى حبها فيمرض القلب ويذهب به عبد الحليم الى الطبيب وتتصاعد الاحداث

ساجسد هذه القصة فى شكل مسرحية هزليه من فصل واحد .

المشهد الاول

طول عمري قلبي خالي ويخاف من الغــــــــــــــــرام

من كل رمش جارح في نظرة وابتســــــــــــــــــــــام

كانت العيون تقابله وتلمح بالكــــــــــــــــــــــــــــلام

يهرب من قبل حتى ما يردلهم ســـــــــــــــــــــــــلام

لحد عنيه ما قابلوني .. نسيت روحي وتاه عقلـــــــي

وطال الشوق وظلموني .. واتاري القلب هوّ اللــــــي

ظلموه .. ظلموه

- يجلس عبد الحليم وقلبه على احدى المقاهى الشعبية يحتسون الشاى

عبد الحليم : وبعدين يا قلبى معاك بقى ... انت مش ناوى تحب واحده ؟ انا تعبت خلااااص وعاوز اتجوز

القلب : هوه احنا اللى هنعيده نزيده ياعندليب ؟ .. ما انت عارف ان انا ماليش فى قصص الحب دى ... وبعدين انا بخاف م الرموش الجارحة بصراحة يعنى ..

عبد الحليم : رموش جارحة ايه بس ... انت بتصدق الحاجات دى ؟ ... يبنى دى كلها رموش صناعيه . اسالنى انا .. وبعدين انت عارف ان انا رومانسى ولازم اللى اتجوزها اكون بحبها ... يعنى لازم تكون انت موافق عليها

القلب : بره عنى بقى ... ماليش فيه ... انا مش حمل الحب وعذابه

عبد الحليم : عذابه ؟ تصد قفلتنى ... قوم يالا من هنا يالا ... قووم

-فجاه تظهر بعض العيون القادمة من بعيد ... ما ان يراها القلب حتى يصرخ فى عبد الحليم قائلا : خبينى بسرعة من العيون دى ... خبينى .. خبينى

عبد الحليم (فى استظراف واضح ) : خبينى ايه ياعم هو انت فاكرنى محمد فؤاد ؟

القلب : ابوس ايدك بلاش استظراف

-ثم يقفز القلب خلف عبد الحليم مختبئا

وعندما تقترب العيون من المقهى تقترب احاهما قائله : صباح الخير يا عندليب

عبد الحليم : صبااحو .. ايه الاخبار ؟

ترد عليه : فل يا عندليب ... (تلحظ وجود شئ خلف عبد الحليم فتقول) : اومال مين اللى وراك ده ؟

عبد الحليم يجذب قلبه من خلفه ويقول فى حرج) : ده قلبى ... سلم على العيون يا قلبى

-يرتبك القلب ولا يستطيع قول شئ

-تتقدم احد العيون من الخلف مادده يدها للقلب وتقول : هاااى

-يحدق القلب فيها لثوانى ثم يسقط على الارض مغشيا عليه من هول جمالها

عبد الحليم (فى هلع) : قلبــــــــــــــــــــــــــــى ....

-تقول احد العيون : حد يطلب الاسعاف بسرررعة

المشهد الثانى

جبت الطبيب يداوي سألني الجرح فيــــــــــــــــــــــن

قلت اسأل دق قلبي اللي زايد دقتيــــــــــــــــــــــــــن

سمع في القلب حاجه وقال ده رمش عيـــــــــــــــــن

صاحبه رماه وناسي بقاله جمعتيـــــــــــــــــــــــــــن

لحد عنيه ما قابلوني .. نسيت روحي وتاه عقلـــــــي

وطال الشوق وظلموني .. واتاري القلب هوّ اللــــــي

ظلموه .. ظلموه

فى عيادة احد الاطباء .............

عبد الحليم : الحقنى يا دكتور الحقنى ...

الدكتور : خيير خيير ؟

عبد الحليم : شوف قلبى ... اغمى عليه فجأه

الدكتور طب حطه على سرير الكشف

-يقوم الدكتور من على مكتبه .. ماسكا السماعة الطبية و متوجها لسرير الكشف

يقوم بوضع السماعة على القلب ثم يقول لعبد الحليم (فى ثقة) : هه .. يا عم متقلقش .. قلبك زى الفل .. بس هوه فيه رمش عين فى قلبك بقاله جمعتين هو اللى خلاه يغمى عليه

عبد الحليم : بقاله جمعتين ايه بس ؟ .. ده لسه مغمى عليه دلوقتى !!

الدكتور (فى حرج) : احم .. عديه يا عندليب علشان وزن الاغنية بس

ثم يضيف : انا هكتبله دوا تديهوله مرتين فى اليوم ولازم يرتاح رااحة تامة

ياخذ عبد الحليم الروشتة ويحمل قلبه متوجها الى منزله

المشهد الثالث

انا اللي السحر دايما كنت اهرب من عينيــــــــــــــــه

وانا اللي قلبي عمره محدش جار عليـــــــــــــــــــــه

ازاي حبيتك انت وحبيتك انت ليــــــــــــــــــــــــــــــه

احتار القلب يسأل واحترت اقولّه ايـــــــــــــــــــــــــه

لحد عنيه ما قابلوني .. نسيت روحي وتاه عقلـــــــي

وطال الشوق وظلموني .. واتاري القلب هوّ اللــــــي

ظلموه .. ظلموه