بقلم : نور الهدى
رباعيات صلاح جاهين
بتوزيع جديد
قالو الجدع مات م العذاب قلت ياه
سالت هو قاتل ..ولا ايه اللى جناه
ردو قالولى لا بس الامن فيه اشتبه
قلت اه عليكى يابلدى والف مليون اه
وعجبي
-----------------------------
قالولى بلد الامن قلت صحيح
لفيت فى الشوارع لقيت البشر بتصيح
الامن مش مصري لا ده يهود
وكل يوم واحد يموت م الشعب جريح
وعجبي
--------------------------------
سمعت صوت ضجيج قلت اكيد القيامة
بصيت لقيت هتافات وناس كتير يامة
شايلين جثة شهيد بيقولو مات م الضرب
هم اليهود جم هنا ولا ده جيش اوباما
وعجبي
---------------------------------------
نسمة ربيع عدت على خد ام بتبكى
تصرخ اه ياحرقتى عليك يافلذة كبدى
داسو شبابك تحت جزمة ميري
ومين ياخد لى حقك خلاص نفد صبري
وعجبى
------------------------
تاجر حشيش قالو وعليه احكام
والامن عينه صاحية وعمرها ماتنام
ممكن تنام عن مجرم لوكان مسئول كبير
لكن لباقى الشعب فيه الف والف لجام
وعجبي
-----------------------------------------------
عصفور صغير بيغنى بصوت مخنوق
بينادى على ابن ادم يلا صحصح وفوق
ماترضى يوم بالذل ده ربك اسمه العزيز
قوم نفض التراب عن راسك واطلع برة الشقوق
وعجبي
----------------------------------------
كرباج الذل والفقير منه اتجلد
مات الشهيد وروحه تلف البلد
يصرخ وصوته طالع عالى من قبره
وماحد بيقول غير عينى عليك ياولد
وعجبي
---------------------------------------------
حلوة الحياة لما تكون بكرامة
مش نمشي جنب الحيط ونقول فين السلامة
عمر السلامة ماتيجى وسط الذل
وناس تعيش وتموت وحاسة بطعم الاهانة
وعجبي
0 التعليقات
إرسال تعليق
إذا كنُّا قدمنا لك الفائدة من خلال الموضوع المعروض لا تنس وضع تعليقك ورجاءً عدم وضع روابط إعلانية