"بردعه لكل حمار" رسالة لوزير التعليم العالى

كتب : ناريمان عامر

السيد/ وزير التعليم العالى (واللى فى ظل الظروف المقندله دى مابقتش عارف انت مين ولا مين)!

الكلام ليك انت سيدى الملقب بـ / الوزيــر

انا ابنك الطالب المسكين المطحون اللى

عمالين تلعبوا فى عداد دراسته مابين انفلونزا طيور وخنازير ومابين ثورة التحرير ..

أحب احيط سيادتكم علمآ بإن العداد باظ والحمدلله :) .. لكن مش هيه دى المشكلة .. هنحط فوطه على العداد وهتعدى ان شاء الله :D

المشكلة الحقيقية اللى عاوز اكلمك فيها يا سعادة الباشا الوزير ليها علاقه بحرية الرأى والتعبير ..

انا وزمايلى عملنا مظاهرة فى قلب الجامعة .. بنطالب بحقوقنا الشرعية ورافعين يافطه كاتبين عليها "سلميه" .. لحد دلوقتى كلآمى فيه حاجه مش عادية ؟؟

المهم عشان ما اطولش على سيادتك .. عميد الجامعه مشكور بعتلنا واحد يتفاهم معانا اسمه الدكتور / مدكور

وسألنا: ايه مطالبكم يا شُطار ؟؟

قلنا: حاجه بسيطه .. بنطالب ببردعه لكل حمار

قال: مش فاهم .. وضحوا اكتر .. احسن عقلى منى طار

قلنا: يا دكتور لما يكون الترم 3 شهور منهم واحد طار اجازات على مظاهرات على اضرابات يبقى اتبقى معانا شهرين .. 7 اسابيع كل اسبوع أجازة يومين .. يعنى يا دكتور يعملوا كده 14 يوم فى 7 مواد ؟؟ يبقى نصيب المادة يومين!

هلحق أخلص فيهم ايه انا ولا ايه؟؟

بقعد احفظ واحفظ واحفظ .. مااستوعبش انا بعمل ايه؟؟ :(

واما بروح الامتحان وبشوف ورقة الاسئلة .. بتنح .. ويا الحق اكتب يا مبلحقش .. والدكاترة فى التعليم ما بترحمش :(

واما النتيجه يعلقوها .. نص الدفعه بيسقطوها!

واللى بينجح من الشطّار .. بيتخرج بدرجة حمار!

فــ احنا سيادتك قلنا نقصر المشوار .. وجينا نطالب بالبردعه لكل حمار ..

قال الدكتور: كان على عينى مش بإيديا .. دى سياسة عليا .. والكلية مافيهاش ميزانية

قلنا: يا دكتور طب والحل؟؟

قال: الجأوا لوزير التعليم والتربية .. اذا ما أفدش يبقى عليكم وعلى المالية

فــ بالأصالة عن نفسى وبالنيابة عن زملآئى بطلب من سيادتك "بردعه كل حمار"

ماهو ياتعاملونا بما يرضى الله وتخلولنا العلم سلاح نتنور بيه ؟؟ .. يا تغيروا هويتنا فى الكارنيه..

وبدل الطالب .. تبقى حمـــار!!!