بقلم / ناريمان عامر
الأخت الفاضلة / حسـنـات .. منورة الفيس بوك يا ست البنات
أعرفك بنفسى .. أنا البنت اللى من 3 أيام بعتلك آد وأنتِ تفضلتِ عليـّا وقبلتيه فى نفس المعاد
أنا بس فى كلمة محشورة فى زورى بقالها زمان .... وكنت كل ما أشوفك عند
صديقى إيًّاه .. اللى اسمه "فلان" .. تبقى خلاص على طرف لسانى .. لكن أرجع وأقول امسكى نفسك أحسن يقولوا دى غيرة نسوان :( لكن خلاااااص فاض بيـّا الكيـل وحاسـة الحمل عليـّـا تقيــل .. فاستحملينى فى اللى هقوله واللى فضلت أفكر فيه اللـيــل بطوله
صورتك دى اللى على الفيس بوك؟ لأ وعملآلى فيها "نيـو لـوك" !
"يــا أخـتـى حِــلـــوة" ... على رأى الأستاذ مبروك
واللى زهلنى وأنا بتفحصها .. تعليقات أصحابك عليها ... يا سلام على ده كلام :D
واحده تقول : سو كيوت ! .. ولا التانية داخلة تقولك ها الميك آب كتير مظبوط ...!!
واللى يقول : هو القمر ساب السما وجه عندنا ! ... وواحد غيره : لك تؤبرنى ها العيون بدفع نص عمرى لو بتكونى ليّـا أنا !!... (يأصف عمرك يا الغلا) ؛
وغيره وغيره .. اللى يعاكس .. واللى يقبّح ..واللى جمالك خلاه يتنح .. !!
وسط ده كله شايفاكى هايصة وفرحانة بصورك اللى عمالة تنزليها واحده فى واحده وتعليقات الشباب عليها ... وكأنها سلعة رخيصة سيباهم يبيعوا ويشتروا فيها !
ده يحفظها ... وده ينقلها .. وده عجبته وحب يشارك فيها أصحابه .. فــ يشــيّـرها !!
وأنتِ فى وسط ده كله وخداكى السكينة ومبسوطة معرفش ليه ؟؟ !
مع إنك أنتِ السلعة المعروضة ؟؟!
ولاااا خايفة م العنوسة فبتدورى بيها على عريس فيه المواصفات المطلوبة ؟!!
طيب علشان ما أظلمكيش ... وتقولى بتتجنى عليّا .. هافترض أنا حُسـن النيـه وهديكى فرصه تطلعينى على أسبابك القويـة
:D
هتقوليلى : أنا مابضيفش غير أصحابى اللى أعرفهم ويعرفونى ودول بقى معايا فى الشغل أو فى الجامعة وكده أو كده بيشوفونى :)
ماشى يا سيتى .. أنا معاكى .. بيشوفوكى ويعرفوكى وواثقة فيهم و واثقين فيكى .. لكن القلوب قـلابـة .. والدنيـا غـلابة .. والنفوس أوقات بتضعف .. واللى النهاردة صاحب وحبيب بكره يصبحلك غـريـب !!
ولو فرضت معاكى إنهم ملايـكـة (مع إننا ع الأرض مش فى الجنة)؛
طيب والناس اللى مش يعرفوكى وفى صورة بروفيلك بيشوفوكى ؟؟ دول كمان واثقة فيهم ؟؟ !
هتقولى : الصورة بعيدة والملامح مش أكيد ؟
ما التكنولوجيا كل يوم بتتطور ... برامج هاكر تسرق .. فوتوشوب يزوّر !
هتقولى : مايسرقوها ويزوروها يعنى هيعملوا ايه بيها؟
لأ دول ممكن يعملوا ويعملوا .. بس ساعتها ماتلوميش غير نفسك .. ما أنتِ اللى مسمعتيش لـديـنـك .. ومن قبلها خُنتـى ثـقـة أهلك
سمعاكى بتقولى : وأنتِ سايبة كل حاجة وجاية تقوليلى اعملى وماتعمليش وعملالى فيها شيخة ؟ ما تروحى تنصحى نفسك .. وأنتِ يعنى ما بتغلطيش ؟؟ :D
لا يا سيتى مانيش شيخة ولا حاجة ... أنا بس شوفت صورتك قدامى وقريت تعليقات أصحابك عليها مقدرتش أمسك نفسى ... أصلك مش حِلــوة يا حـســنـات .. والكلام اللى بيتقالك عليها ده كله مجاملات
:D :D
فـ أنا قولت أقولك رأيى فى رسـالة ع الفيس بوك ... وأنا عارفة إنى كده أو كده هاخــدلى بـلـــوك :D
"يا بنت بلدى يا مصــريـة عـيــب عليكى مسلمة كنتِ أو مسيحية .... الفيس بوك ماهواش خاطبة ولا شبكة علاقات عاطفية ... الفيس بوك شبكة تواصل اجتماعية"
1 التعليقات
سيبك انت من الموضوع الجامد اللى بيوصف حال الناس و الحياة ده و واقعى جدا و انا اعجبت بيه صورة البنت الصغنونة ديه جميلة :D
إرسال تعليق
إذا كنُّا قدمنا لك الفائدة من خلال الموضوع المعروض لا تنس وضع تعليقك ورجاءً عدم وضع روابط إعلانية